NEWS ARCHIVE

SUID-KAAP TOER 2006

Die finalejaar BSc (Agric) Veekunde studente het ‘n toer meegemaak deur die Suid-Kaap waar hulle skaapplase, ‘n melkery, volstruis plaas en –abattoir en kaas-, mout- en canola olie fabrieke besoek het.

Dag 1:

Michael Swart se Dohne Merino stoet naby Caledon was die eerste stop. Michael was verlede jaar die Suid-Kaap Boer van die jaar en het voorwaar ooie en ramme van top gehalte. Pieter Swart en die plaasbestuurder, Oom Japie, het ons vir ‘n toer deur die plaas gevat en vertel van hulle boerdery metodes. Hulle is gedurig besig met hulle eie proewe op die plaas om met die nuutste tegnologie op hoogte te bly.

Na ‘n heerlike middagete vertrek ons na die SA Moutery op Caledon. ‘n Toer deur die fabriek wys ons hoe gars verander word in mout, die hoof bestanddeel van bierbrouery. Ons kry die geleentheid om verskeie biere, appelbiere en vrugtesappe te proe – alles produkte wat deur SAB vervaardig word. Voorwaar ‘n fees!

Ons oornag by die karavaanpark in Bredasdorp, waar ons ‘n lesing kry van André Fourie – ‘n privaat landboukonsultant van Anker Agri Konsultante. Hy verskaf waardevolle inligting aangaande werksgeleenthede wat beskikbaar is nadat die vierjaar graad voltooi is.

Dag 2:

Die volgende oggend bied André Uys, ‘n landbou ekonoom van Overberg Agri Koöperasie op Caledon, ‘n lesing aan oor die verskeie boerdery vertakkings in die Overberg streek.

Daarna word Dirk Uys se Merino stoet net buite Bredasdorp besoek. Hy vertel ons van sy bestuursprogram en Gert van BKB wys die ras standaarde van ‘n Merino ooi en ram.

Na ‘n stewige middagete by Dirk Uys, vertrek ons na Swellendam. Ons gaan vir ‘n besigtigingstoer deur die SOILL Canola Olie Fabriek net buite Swellendam. Ons elkeen kry ‘n bottel canola olie as aandenking. Met ons aankoms by die karavaanpark, waar ons oornag, stap ons so 500m na ‘n plaasdam om ‘n lafenissie in die vreeslike hitte te kry.

Dag 3:

Ons volgende besoek is aan Ian Oosthuizen se melkery waar hy ‘n totaal van 900 koeie in melk op die plaas het en twee draaitafels wat 50 koeie op ‘n keer melk. Dit is voorwaar vroeg opstaan, aangesien die koeie 5 uur in die oggend gemelk word. Die melkery was baie indrukwekkend en is op die voorpunt van die jongste tegnologie.

Ons vertrek na die volstruis abattoir in Swellendam waar ons deur vensters kyk hoe baie streng HACCP maatreëls toegepas word met die slagproses. Daarna word Stander Terblanche se volstruisboerdery besoek, wat net buite Swellendam geleë is. Allerhande volstruisprodukte is uitgestal en ons proe aan volstruis Russians, kouevleis en weense worsies.

Ter afsluiting van die toer, besoek ons Parmalat se kaasfabriek op Bonnievale. Dolf Lategan neem ons vir ‘n interessante toer deur die fabriek en ons word heerlik trakteer met ‘n kaasproe. Die lang pad huis toe word aangedurf en ons arriveer veilig terug op Stellenbosch. Baie dankie aan almal wat ons so op die hande gedra het tydens ons besoeke!

Kliek hier vir die Suid-Kaap Toer fotogalery.


 
Back to top

 

BACK TO NEWS

 
       
 

Web design: Lise-Marie All rights reserved © Department of Animal Science 2005