Die algemene doelstelling van die program is om studente toe te rus met

• gevorderde kennis van minstens een taal;
• basiese gebruiksvaardighede in een of twee verdere tale;
• die vermoë om verskillende vorme van taaluitinge krities en kreatief in die toepaslike kulturele konteks te kan gebruik, ontleed en interpreteer; en
• insig in die wyse waarop taal in verskillende kulturele diskoerse verweef is.

• Volle matrikulasievrystelling
• Prestasie in Graad 12: 'n gemiddelde van 50%
• Indien Musiek gevolg word: Graad IV (Universiteit van Suid-Afrika) in beide teorie en prakties of ekwivalent soos deur Departement Musiek bepaal en/of die aflegging van ’n toelatingseksamen

Die program word saamgestel uit vakke en modules wat uit drie groepe gekies word, nl. taalvakke (Groep 1), kultureel-kontekstuele vakke (Groep 2) en modules waarin die konseptuele en metodologiese grondslae van hierdie vakke aan die orde kom (Metadissiplines: Groep 3). Studente neem

• 5 vakke in die eerste jaar, plus ’n 6 krediet-module in Inligtingsvaardighede;
• 4 vakke in die tweede jaar; en
• 2 vakke plus 2 metamodules uit Groep 3 in die derde jaar.

Die volgende algemene riglyne geld vir die keuse van vakke:

1. Studente neem in hulle eerste twee jaar ’n minimum van twee taalvakke uit Groep 1, waarvan ten minste een taalvak tot in die derdejaar gevolg moet word.
2. Ten minste een vak uit Groep 2 moet in die eerstejaar geneem word.
3. Twee modules uit Groep 3 wat gesamentlik 24 krediete tel, moet in die derdejaar geneem word.
4. Die oorblywende vakke en modules word uit Groep 1 en/of Groep 2 gekies, m.d.v. dat ’n tweede- of derdejaarsvak telkens ’n voorafgaande eerste- of tweedejaarsvak onderskeidelik voortsit.
5. Bo en behalwe die modules soos hierbo aangedui, volg alle studente die verpligte 6-kredietmodule Inligtingsvaardighede 172.

Studente neem dus óf twee tale, óf ’n taal en ’n kultuurverwante vak as hoofvakke.