Kontak Dr. Pierre Goosen in verband met Leierskap
(021) 808-3382

Diens aan Predikante: Netwerk vir Leierskapbegeleiding

Buvton is tans besig om saam met die SKP (Sinodale Kommissie vir Predikanteversorging) 'n Netwerk vir Leierskapbegeleiding te ontwikkel en te vestig. Die Netwerk vir Leierskapbegeleiding het ten doel om predikante en later ook gemeenteleiers te ondersteun en te begelei in die ontwikkeling van hulle leierskap in die gemeente.

1. Roeping as uitgangspunt: In ons navorsing tov die amp van die predikant het dit vir ons duidelik geword dat die roeping van die predikant soos 'n goue draad deur die geskiedenis van die ontwikkeling van die ampsbeskouing is. Hierdie persoonlike roeping is nie staties nie, maar is saam met die persoon voortdurend aan die ontwikkel. Bybels-teologies is die drie-voudige amp van koning, priester en profeet die mees kompakte beskrywing van die inhoud van ons roeping as gelowiges en ook as predikante. Binne hierdie algemene roeping roep God individuele predikante en gemeenteleiers om ‘n spesifieke en unieke vulling hieraan te gee. Die Netwerk vir Leierskapbegeleiding se uitgangspunt is dat die energie van predikante om passievol met hulle werk te kan voortgaan, hoofsaaklik gevoed word deur 'n voortdurende ontwikkeling van die roeping wat ons van God ontvang. As daar oor roeping onduidelikheid of onsekerheid ontstaan word die werk van 'n predikant meganies en ontstaan daar nie alleen 'n gebrek aan energie nie, maar tree daar ook 'n verlies aan identiteit in.

2. Ontwikkeling van kapasiteit
Die roeping van die predikant word gekonkretiseer in die verskillende leierskaprolle en uitsette wat predikante in gemeentebediening vervul. Ons werk tans met vyf rolle wat predikante in hulle gemeentebediening kan vervul nl dissipel, visioneerder, vriend, mobiliseerder en bemagtiger. Vir elkeen van die vyf rolle is 'n kapasiteitsmodel ontwikkel wat as raamwerk dien vir die persoonlike ontwikkeling van predikante tov die spesifieke rolle. Hoewel al hierdie rolle nie in elke konteks ewe belangrik is nie, verskaf dit aan ons 'n raamwerk waarbinne die predikant sy of haar roluitklaring kan doen. In ons begeleiding wil ons predikante help om insig te ontwikkel tov hulle vlakke van bevoegdheid tov die verskillende rolle. Hieruit word groei geleenthede bepaal en die predikant gehelp om 'n persoonlike ontwikkelingsplan te ontwerp om hulle kapasiteit te ontwikkel.

3. Ontwikkelingsdienste
Die Netwerk vir Leierskapbegeleiding beskik oor 'n wye verskeidenheid van dienste wat gebruik kan word tov die persoonlike ontwikkeling van predikante. Hierdie dienste sluit in:
Pastor pastorum gesprekke van kollegas, terapie, kursusse, retraites, persoonlike mentoraatskap, bedienings-afrigting (coaching) ens.
Die dienste word deur ‘n netwerk van kundige persone en instansies gelewer wat almal deel uitmaak van die Netwerk vir leierskapbegeleiding.

4. Integrasie in die praktyk van gemeente-bediening
Die Netwerk vir Leierskapbegeleiding het verder ten doel om die predikant wat deur ‘n periode van persoonlike ontwikkeling gegaan het te ondersteun tov die integrasie van die nuwe insigte en vaardighede in die praktyk van die gemeente-bediening. Dit behels oa om ‘n kultuur van versorging en ontwikkeling in die gemeente te vestig en saam met die kerkraad te onderhandel tov unieke uitsette wat die predikant in die gemeente moet lewer. In die gevalle waar die gemeente van Buvton se fasiliteringsdiens gebruik maak, sal die gemeenteproses met dié van ontwikkeling van die leraars geïntegreer word.

Standplaaswisseling
Die SKP inisieër en stimuleer bilaterale en multilaterale standplaaswisselings en wil predikante aanmoedig om met mekaar te gesels oor moontlike ruilings. Daar het reeds ‘n aantal suksesvolle standplaaswisselings plaasgevind. Indien ‘n persoon hiervoor in aanmerking wil kom, kan die predikant self, of die kerkraad, of die verantwoordelike instansie die voorsitter van die SKP (Jannie le Roux. Tel: 021-856 1385 of jgleroux@isales.co.za) kontak.