Navorsing

Navorsing

Ons Navorsingsgroepe fokus op moelike kwessies in die praktyk van ons kerklike en gemeentelike lewe. Ons probeer om goeie en verantwoordelike akademiese werk te doen, maar die uitdruklike bedoeling is om gemeentes te help met die insigte wat ons bekom en die materiaal wat ons ontwikkel.

Lees hier interessante bydraes in die navorsingsgroepe hieronder gelewer is. Kyk gerus ook na ons boekhoek waar ons gereeld enkele boeke resenseer en ook na die dagkonferensies wat vir die volgende maande beplan word.

Hierdie groep fokus op hoe Christene vandag oor God, die wêreld en die lewe moet dink. Hulle kyk weer na die Bybel en die klassieke belydenisse van die kerk, en werk aan 'n eietydse geloofsleer vir volwasse mense van die 21ste eeu.
Koördineerders: Dirkie Smit, Coenie Burger

BO

Die erediens kan wel verryk word deur meer aandag aan die liturgie te gee, maar dit mag nie veroorsaak dat die prediking verwaarloos word nie. Goeie prediking is steeds 'n wesenlike deel van ons eredienste en ons hele bediening.
Koördineerders: Ian Nell, Johan Cilliers,
Coenie Burger

BO

Baie lidmate vra hoe sinvol en betekenisvol die gemeentelike erediens is. Dit is ook bekend dat tans baie wyd geëksperimenteer word met die vorm van die erediens. Dié groep doen dieptenavorsing oor die hart van die erediens, hulle kyk na allerlei vernuwingspogings in verskilllende tradisies, en ontwikkel materiaal wat gemeentes kan leiding gee oor sinvolle erediensvernuwing.
Koördineerders: Cas Wepener, Wynand Nel

BO

Daar is wye instemming dat kleingroepe, wat veral koinonia bevorder, 'n belangrike deel van die bediening in vitale gemeentes sal wees in die volgende paar dekades. Hierdie groep kyk na verskeie maniere waarop verskillende soorte kleingroepe in die gemeente aangewend kan word.
Koördineerders: Frederick Marais, Nico Simpson, Marié Brits

BO

Daar is heelwat kommer oor die stand van gesinne in ons land – 'n onontbeerlike bousteen vir 'n gesonde samelewing. Dit word wyd aanvaar dat geloofsgemeenskappe 'n sleutelrol kan speel om die gesinslewe en -funksionering te verbeter. Daarmee saam word na probleme met jeug en jeugbediening gekyk.
Koördineerders: Frederick Marais, Christo Thesnaar

BO

Dié groep fokus op wat geloofsgemeenskappe kan doen aan die enorme morele krisis wat ons land tans beleef. Ons hoop om gemeentes te help om effektiewer aan die karaktervorming van hul lidmate te werk. Die kerk se openbare verantwoordelikheid betreffende morele kwessies en morele waardes in die algemeen kry ook aandag.
Koördineerders: Nico Koopman, Robert Vosloo, Coenie Burger

BO

Baie gelowiges sukkel om hul daaglikse werk (beroep) sinvol in verband te bring met hulle geloof. Hierdie onvermoë het verskeie nadelige gevolge vir die kerk en die samelewing. Dié groep ontwikkel materiaal waarmee gemeentes hul lidmate met hierdie kwessie kan help.
Koördineerder: Johan Botha

BO

In die veranderde situasie in die land sukkel feitlik alle gemeentes om geld te vind om hul werk effektief te doen. Dié groep kyk na die oorsake hiervan en formuleer riglyne vir gemeentes oor effektiewe fondsinsameling en verantwoordelike geldelike bestuur. Die uitgangspunt sal wees dat ons Bybels oor geld moet leer dink en dit as deel van ons algemene rentmeesterskap sal sien.
Koördineerders: Monty Sahd, Coenie Burger

BO

Hoewel vroue deur die eeue 'n reuse rol in gemeentes gespeel het, was hulle tradisioneel uitgesluit van die leierskap van die kerk. Dié groep fokus op die regstelling van die probleem deur hulle te beywer vir inklusiewe leierskap in gemeentes. Gemeentes moet bewus gemaak word van die unieke bydrae van vroue tot die geloofsgemeenskap.
Koördineerder: Elna Mouton, Carin van Schalkwyk, Franziska Andrag-Meyer, Mary-Ann Plaatjies en Ben du Toit (kommunikasie)

BO

Daar is heelwat vrees dat versoening en eenheidsprosesse op gemeentelike sowel as breër kerklike vlak nie genoeg aandag kry nie. Hierdie groep gaan soek na maniere waarop die probleem konstruktief hanteer kan word. Ons het kerklike gemeenskappe in gedagte wat plekke van omvattende vrede is. Daarom noem ons dié projek: Shalom Journeys - from division into peace.
Koördineerders: Frederick Marais, David Botha, Pieter Grove

BO

Een van die uitdagings vir alle gemeentes is om betekenisvol betrokke te raak by gemeenskapsontwikkeling. Dié groep wil predikante en gemeentes leiding gee oor hoe om plaaslike gemeenskapsprojekte te ontwikkel.
Koördineerders: Pieter Grove, Willie van der Merwe, Naas Swart

BO

In die Gereformeerde tradisie het lering nog altyd n baie sentrale rol gespeel. Na 'n tyd waarin lering verwaarloos is, wil hierdie groep saam soek na praktyke en prosesse wat ons kan help om die rol van lering te herstel.
Koördineerders: Nico Simpson, Chris Jones, Ben du Toit, Coenie Burger

BO

Meer as vyftig jaar gelede het die digter Peter Blum al gesê dat ons moet weet ''op watter vasteland ons boer''. Deesdae word die waarheid van hierdie uitspraak allerweë besef, ook in die kerk. Daarom wil hierdie navorsingsgroep kyk na die aard van die wisselwerking wat daar is tussen die Gereformeerde teologie en ‘n Afrika-konteks behoort/kan bestaan.

BO

Die demografiese studie wat die Sinode tans onderneem toon duidelik dat die proses van verstedeliking versnel ook in ons streek. Plattelandse dorpe en gemeentes loop leeg en sukkel om te bestaan. Die ander kant is dat gemeentes in die stad nie noodwendig in staat is om die stedelike konteks te verreken in hulle bediening nie. Die vraag is of ons gemeentes nie nog eintlik maar plattelandse gemeenskappe in die stad is nie, en daarom in gebreke bly om die stad werklik te bedien. Het ons gemeentes en gemeenteteorie al werklik tuisgekom in die stad?
Koördineerders: Frederick Marais, Braam Hanekom, Nico Koopman, David Newby

In lyn met die Suid-Afrikaanse Vennootskap vir Gestuurde Gemeentes wil Buvton 'n groter ''think tank'' daarrondom organiseer. Hierdie groep sal hulle toespits op dieptenavorsing oor ekklesiologie.
Koördineerders: Pieter van der Walt & Frederick Marais

Buvton wil graag begin met ’n navorsingsgroep wat kyk na spiritualiteit, aangesien ons dink dat daar tans so ’n behoefte bestaan. Persone wat geïnteresseerd is in so ’n groep moet asseblief laat weet en dan sal ’n datum met diegene uitgeklaar word.
Kontak of of 021-808 3624

Daar bestaan in hierdie gemeentes ‘n behoefte aan ‘n beter gefokusde bediening aan afgetrede persone met hulle eie unieke behoeftes. Terselfdertyd bestaan daar ook ‘n behoefte om die bediening in gemeentes optimaal in te rig sodat afgetrede persone met hulle besondere gawes en vaardighede ook van hulle kant af die koninkryk so goed as moontlik kan bedien. Hierdie groep doen navorsing met die oog op ’n beter praktyk in hierdie verband.
Koördineerders: Kobus Kellerman, Cas Wepener

BO