Hierdie studie is ‘n gestruktureerde evaluering van die integrasie van IKTs (Informasie- en Kommunikasietegnologieë) in leer- en onderrigaktiwiteite by die Universiteit van Stellenbosch. Alhoewel daar wel anekdotiese bewyse is dat die e-Leer inisiatiewe by die Universiteit van Stellenbosch suksesvol is, spreek hierdie studie die vrae binne ‘n gestruktureerde benadering aan met inagname van die globale en plaaslike hoër onderwys konteks om:
§ Die e-Leer projek (as deel van die e-Kampusinisiatief) en ander e-Leer inisiatiewe te verbeter,
§ Kennis te genereer om ons begrip van hoe e-Leer inisiatiewe werk en hoe mense hulle houdings en gedrag as gevolg van suksesvolle intervensies verander, te verbeter,
§ Die institusionele eienskappe om sukses te behaal met die integrasie, te evalueer,
§ Die tegnologiese omgewing, en meer spesifiek die gebruik van WebCT as leer bestuurstelsel te evalueer, en
§ Die totale vordering met e-Leer inisiatiewe by die Universiteit van Stellenbosch te evalueer.

Hierdie evaluering word gedoen met inbegrip van die breër globale en plaaslike veranderende konteks, met spesiale inagname van die wisselwerking tussen drie van die hoof globale drywers. Die drie drywers wat bespreek word is: kennis as drywer van groei in ‘n netwerksamelewing, die revolusie in informasie en kommunikasie tegnologieë, en nuwe kompetisie in die hoër onderwys landskap. Die eerste deel van die studie is dus ‘n literatuuroorsig van die veranderende globale hoër onderwys landskap, met ‘n spesifieke fokus op hoe hierdie veranderinge binne die unieke Suid-Afrikaanse hoër onderwys landskap ná 1994 gekontekstualiseer word.

Terug na bo

Na 'n oorweging van die globale en Suid-Afrikaanse konteks, voorsien die studie ‘n kritiese oorsig van die status van die integrasie van IKTs in leer- en onderrigaktiwiteite wêreldwyd, die moontlike voordele van die integrasie van IKTs in leer- en onderrigaktiwiteite en die implikasies van hierdie veranderinge vir dosente en studente, sowel as vir die institusionele en tegnologiese omgewings van hoër onderwys.

Hierdie oorsigte van beide die veranderende globale hoër onderwys landskap en die integrasie van IKTs in leer- en onderrigaktiwiteite verskaf die agtergrond vir die gevallestudie en retrospektiewe evaluering van die e-Leer aktiwiteite by die Universiteit van Stellenbosch. Die studie bevat ‘n beskrywing van die e-Kampus inisiatief, die e-Leerprojek en ander e-Leer inisiatiewe. In die retrospektiewe evaluering, wat die hooffokus van die studie uitmaak, maak ek gebruik van kwantitatiewe en kwalitatiewe metodes om die resultate van twee vraelyste te ontleed wat aan studente en dosente wat WebCT gebruik, versprei is. Hierdie resultate is geïntegreer met ander databronne om die vordering wat reeds aan die Universiteit van Stellenbosch gemaak is, te evalueer.

Hierdie retrospektiewe evaluering van die e-Leer aktiwiteite by die Universiteit van Stellenbosch teen die agtergrond van die veranderende globale hoër onderwys landskap, stel my in staat om algemene aanbevelings te maak om:
§ Op institusionele vlak veranderinge te hanteer wat ‘n resultaat is van die drie kragte wat bespreek is,
§ IKTs op institusionele vlak in alle besigheidsprosesse van die instelling te integreer,
§ IKTs in leer- en onderrigaktiwiteite te integreer, terwyl aandag geskenk word aan die institusionele en tegnologiese omgewing wat dít moontlik maak, asook aan goeie leer- en onderrigpraktyk, en
§ Die implementering van die e-Kampus inisiatief, en meer spesifiek die e-Leer projek en ander e-Leer inisiatiewe by die Universiteit van Stellenbosch, te verbeter.

Terug na bo