Edzisani Sodi
Qualitative
reflections on teenage motherhood experiences
Die doel van die huidige studie was om 'n fenomenologiese
ondersoek oor tienermoederskap te doen en uit te vind hoe hierdie
belewenis deel uitmaak van die tienermoeder se bestaan. Deur die sneeubaltoetsingsmetode
is vyf vroue tussen die ouderdomme van 26 en 35 jaar gekies om deel
te neem aan die studie. Al vyf vroue het tydens hulle tienerjare moeders
geword. Diepte-onderhoude is in Noord-Sotho en Venda gevoer, afhangende
van die taalvoorkeur en -vlotheid van die deelnemer. Klankopnames
is van die onderhoude gemaak wat later getranskribeer en vertaal is.
'n Fenomenologiese analisemetode is gebruik om die
oorspronklike data na natuurlike betekeniseenhede (NMUs – natural
meaning units) te herlei wat verder ondersoek is om sentrale sosiologiese
temas geassosieer met die belewing van tienermoederskap te identifiseer.
Behalwe vir die bevinding dat die deelnemers swanger geraak het toe
hulle tussen die ouderdom van 16 en 18 jaar was, is vyf sosiologiese
temas geassosieer met tienermoederskap geïdentifiseer. Hierdie
temas is:
§ 'n Gebrek aan kennis oor seksuele verhoudings dra by tot die
voorkoms van tienerswangerskappe en -moederskap.
§ Vroeë kinderbaring het 'n negatiewe impak op die tienermoeder
se sosiale verhoudings.
§ Tienermoeders is geneig daartoe om emosionele probleme te ondervind
na die geboortes van hulle babas.
§ Tienermoederskap het 'n langtermyn ontwrigtende effek op die
tienermoeder se opvoedings- en werksgeleenthede.
§ Tienermoederskap lei tot betekenisvolle veranderinge in lewenstyl
vir diegene wat die ondervinding deurgemaak het.
Met inagneming van bogenoemde temas word hier voorgestel
dat seksuele opvoeding beide op skool en by die huis 'n meer lewensvatbare
opsie is om die risiko van tienermoederskap in die samelewing te verminder.
Alhoewel ander opsies soos aborsies en die nuutingestelde toekennings
van kinderonderhoud ook vir die tienermoeder beskikbaar is, word hierdie
opsies nie as bevorderlik beskou nie.
Terug
na bo