Rethabile Maluke
Science
and technology policies and structures in Southern Africa: a discussion
of the concept of national system of innovation with reference to Malawi,
Namibia and South Africa.
Die koppelvlak tussen wetenskap en tegnologie en die
gemeenskap het gelei tot die siening van wetenskap as 'n sosiale kontrak
waarin wetenskaplikes, politici en die algemene publiek versoek word
om te erken dat dit nodig geword het om alle vertakkinge van wetenskap
en tegnologie aan te wend om menslike nood te verlig. Wetenskap en
tegnologie word gebruik as 'n instrument om verandering teweeg te
bring ter bevordering van 'n beter kwaliteit lewe en volhoubare ontwikkeling
vir die huidige en toekomstige generasies. Die doel van 'n wetenskap
en tegnologiebeleid is om spesifieke ontwikkelingsdoelstellings te
verwesenlik. Dit is dus noodsaaklik dat hierdie beleid in ooreenstemming
met die nasionale onwikkelingsstrategieë ontwerp moet word. Dit is
ook belangrik om wetenskap en tegnologiestrukture in plek te stel
wat die effektiewe funksionering van die sisteem kan vergemaklik.
Mededingbaarheid is een van die grootste uitdagings
wat Suider Afrika tans in die gesig staar. Met globalisering en die
uitbreiding van wêreldhandel het dit moeiliker geword vir Suider Afrikaanse
ondernemings om in pas te bly met tegnologiese ontwikkeling. In die
lig van hierdie uitdagings stuur die meeste lande in die rigting van
'n Nasionale Sisteem vir Innovasie (NSI) om interaksie tussen beleid,
navorsing en ontwikkeling , menslike hulpbronontwikkeling en industriële
ontwikkeling aan te moedig.
Wat aanleiding gegee het tot hierdie studie is die
wetenskap en tegnologieprobleme wat algemeen voorkom in die lande
in Suider Afrikaanse, naamlik onvoldoende koördinasie meganismes,
swak wetenskap en tegnologie-infrastruktuur en 'n gebrek aan fondse.
'n Kwalitatiewe navorsingsontwerp is gevolg waarin
analise van die inhoud van dokumente as navorsingsmetode gebruik is.
Die studie verskaf agtergrond-inligting oor die teoretiese raamwerk
van die NSI konsep. Gepubliseerde dokumente is gebruik om inligting
te verskaf oor die drie lande wat as gevallestudies dien, naamlik
Malawi, Namibië en Suid-Afrika. Die hooffokus van die gevallestudies
is soos volg: 'n raamwerk van die beleidsdoelstellings van elk van
die drie lande, die konsep NSI soos toegepas deur elkeen en die wetenskap
en tegnologiestrukture in elk van die betrokke lande.
Die studie het swak koördinasie van wetenskap
en tegnologie-aktiwiteite as die sleutelprobleem van aldrie lande
geïdentifiseer. Die strukture verskil effens van mekaar en veral
die plasing van die wetenskap en tegnologiebestuur bepaal die effektiwiteit
van die stelsel. Die Suid Afrikaanse NSI is goed gevestig omdat sy
netwerk versterk word deur die Nasionale Adviesraad vir Innovasie
en die Nasionale Navorsing- en Ontwikkelingstrategie. Volgende is
Namibië wat ‘n sisteem in plek het, terwyl Malawi nog maar
in die beginstadium is van die daarstelling van hul NSI.
Terug
na bo