DOSENT: PROF EM VISSER

KANTOOR: 115

TELEFOON: 021 808 3398

DOEL, RASIONAAL EN UITKOMSTE

Die studente volg ‘n program met Kleding en Tekstiele as spesialisrigtings. Verskeie modules in die program dra by tot diepgang in teoretiese kennis en bepaalde vaardighede en houdings word ontwikkel. Beroepsbeoefening in die Klere- en Tekstielbedryf vereis praktiese ervaring van die wyse waarop ondernemings, hetsy die vervaardigingsektor of die kleinhandel, funksioneer sowel as bestuur en georganiseer word. Die onderhawige module word in die program ingesluit om studente eerstehandse ondervinding hiervan te gee en beroepsgerigte kundighede te ontwikkel.

Die oorkoepelende doel met die module is om studente blootstelling te geen aan en ondervinding te laat opdoen van beide vervaardiging, kleinhandel en/of verwante fasette van die Klere- en Tekstielbedryf deurdat ‘n goedgekeurde praktykgerigte projek in die tweede semester van die finale jaargang uitgevoer moet word. Dit bied verder ook aan studente die geleentheid om teoretiese kennis met praktiese, eerstehandse ervarings van die Klere- en Tekstielbedryf te integreer. Studente moet vir die ekwivalent van sewe weke ‘n internskap doen waartydens hulle onder meer waarneming doen, die dag tot dag take van spesifieke persone saam met hulle uitvoer (shadowing), vergaderings bywoon, voorgestelde take uitvoer en aanbiedings doen. Dit word in oorleg met die Klere- en Tekstielbedryf of ‘n ander toepaslike instansie (bv die WNNR) gereël.

Na suksesvolle afhandeling van die module sal die studente bewys kan lewer van die volgende:

1. Praktykondervinding t.o.v. verskeie fasette van die Klere- en Tekstielbedryf opgedoen het en dit in verslagvorm (geskrewe en verbaal) neerslag laat vind het.

2. Selfstandige besluite en inisiatief geneem het in die uitvoering van beroepsverwante take wat in ‘n portefeulje geboekstaaf is.

3. Suksesvolle uitvoering (tot bevrediging van die betrokke persone) gegee het aan spesifieke opdragte wat deur toesighouers in die Klere- en Tekstielbedryf gegee is.

4. Volledige rapportering (geskrewe en verbaal) van waarnemings, probleme, opdragte en ander relenvante aktiwiteite gedoen het.

TEMAS

Geen spesifieke temas word behandel nie, maar studente ontvang ‘n volledige handleiding met voorstelle oor spesifieke fasette van die bedryf wat waargeneem moet word, waaroor inligting ingesamel moet word en waaroor gerapporteer moet word. Dieselfde handleiding word aan maatskappye wat verantwoordelikheid vir die studente neem, gegee om as riglyn te dien vir die beplanning van leergeleenthede tydens die internskap.

ROOSTER EN KONTAKGELEENTHEDE

Die module het ses praktikums en twee tutoriale per week. Dit word egter nie op ‘n week tot week basis aangebied nie. Studente sal op gesette tye aanmeld vir kontaksessies met die doel om voorligting te ontvang oor opdragte wat tydens die internskap uitgevoer moet word en om terug te rapporteer na afloop van die internskap. ‘n Rooster word hiervoor opgestel. Die internskap word egter as ‘n tipe blokkursus beskou sodat studente vir periodes van twee weke of langer nie op die kampus is nie, maar voltyds by die betrokke maatskappye in die bedryf werk. Studente wat modules agterstallig is, moet hiervan kennis neem en betyds die betrokke dosente hieroor inlig en ‘n reëling tref t.o.v. klasbywoning en toetse. Die kontaksessies en bloktye vir Projek I en Projek II word afwisselend aangebied sodat studente op ‘n bloktyd, wat die ekwivalent is van ongeveer sewe weke, vir elkeen van die projekte moet reken.

LEERGELEENTHEDE EN OPDRAGTE

‘n Verskeidenheid leergeleenthede vorm deel van die internskap. Dit behels kontaksessies met verduidelikings, die uitvoer van opdragte, selfstandige werk, eerstehandse ervaring van die bedryf, waarneming, ens. Elke maatskappy beplan spesifieke leergeleenthede afhangende van beskikbare fasiliteite en personeel. ‘n Volledige handleiding word jaarliks saamgestel wat as riglyn vir studente en die betrokke maatskappye dien.

STUDIEBRONNE

Daar is geen voorgeskrewe handboek nie. ‘n Handleiding word aan studente gegee. ‘n Nuttige handboek wat aangeskaf kan word, is: GRANGER, M. 1996. A guide to analyzing your fashion industry internship. New York. Delmar Publishers.

ASSESSERING

Projek I is ‘n praktykgerigte projek of internskap. Daar is gevolglik geen semestertoetse of eksamens nie. Studente moet egter bewys lewer van kennis wat bekom is, vaardighede wat verwerf is, take wat uitgevoer is en houdings wat ontwikkel het. Gevolglik word verskillende komponente van die module op verskillende maniere gemonitor en geëvalueer. Studente moet weeklikse verslae inhandig. Bykomend hiertoe moet ‘n portefeulje saamgestel word wat geëvalueer word. Studente moet ook ‘n mondelinge verslag lewer van hul internskap. Die betrokke maatskappy waarby studente die internskappe doen, moet ‘n evalueringsvorm invul en ‘n punt aan die student gee. Al hierdie punte word in berekening gebring vir die berekening van die prestasiepunt. Die gewigte van die onderskeie komponente is soos volg:

Weeklikse verslae: 20%

Portefeulje (verslag): 35%

Portefeulje (lewering): 15%

Punt van die industrie: 30%

TEIKENDATUMS

Spesifieke teikendatums word beplan en in ‘n rooster weergegee wanneer die studente finaal by ‘n maatskappy geplaas is. Weeklikse verslae moet elke week ingehandig word op die Maandag van die volgende week. Studente wie se verslae laat is, sal gepenaliseer word. Verslae moet verkieslik met e-pos gestuur word. Spesifieke riglyne vir die formaat van die verslae word in die handleiding, waarna hierbo verwys is, vervat. Datums vir inhandiging van portefeuljes word in oorleg met die studente bepaal, maar word normaalweg twee weke na afhandeling van die internskap ingehandig. Lewering van die portefeuljes vind plaas op ‘n datum in die Novembereksamen en word in oorleg met die studente bepaal.

EM Visser

2005