DEPARTEMENT VERBRUIKERSWETENSKAP: VOEDSEL, KLEDING, BEHUISING

PROJEK 458(32): PROJEK II

KURSUSRAAMWERK: 2005

DOSENT: PROF EM VISSER

KANTOOR: 115

TELEFOON: 021 808 3398

DOEL, RASIONAAL EN UITKOMSTE

Die module vorm deel van ‘n program met spesialisering in Kleding en Tekstiele wat studente voorberei vir beroepsbeoefening in die breë veld van Kleding en Tekstiele, maar meer spesifiek in die Klere- en Tekstielbedryf. Namate die studente se vakkennis verdiep, word leergeleenthede ingesluit wat hulle blootstel aan die hoër denkvlakke van analise, sintese en evaluering. In die tweede semester van die vierde jaargang kulmineer dit in die onderhawige module waar studente met die nodige leiding, maar tog selfstandig navorsing moet beplan, deurvoer en rapporteer. Dié module bou op ander modules wat daarop gemik was om studente se vakkennis te verdiep, hul vermoë ontwikkel om selfstandig bronne te vind, kennis van navorsingsmetodologie te begin bou, kritiese denke en probleemoplossingsvermoë te ontwikkel en die vermoë om verbaal en in geskrewe vorm verslag te doen. In Projek II word daar op hierdie doelwitte voortgebou.

Die oorkoepelende doel met die module is om studente bloot te stel aan en ondervinding te laat opdoen van navorsing ten einde hulle voor te berei vir beroepsbeoefening, maar veral ook vir nagraadse studie.

Na suksesvolle afhandeling van die module sal die studente

1. Oor basiese kennis beskik van geselekteerde teoretiese aspekte van navorsing en dit tydens toetsgeleenthede skriftelik kan weergee.

2. Oor die vermoë beskik om

2.1 ‘n navorsingsprobleem te identifiseer en te formuleer

2.2 navorsingstegniek(e) en –metodes te kies wat geldige en betroubare data sal insamel

2.3 eenvoudige data-analises te doen (met statistiese hulp indien van toepassing)

2.4 gevolgtrekkings kan maak wat op die resultate van die studie gebaseer is.

3. In staat wees om

3.1 ‘n navorsingsvoorstel te skryf en verbaal aan te bied

3.2 ‘n interimverslag te kan lewer

3.3 ‘n navorsingsverslag te skryf en verbaal aan te bied as ‘n navorsingsrapport of plakkaatsessie waartydens geskikte oudio-visuele hulpmiddels gebruik word.

TEMAS

Die volgende teoretiese komponente van navorsing word behandel

Navorsingskonsepte

Doelstellings, hipoteses, aannames, operasionele of werkdefinisies, konseptuele en teoretiese raamwerke

Navorsingstegnieke

Dit dek, onder meer vraelyste, onderhoudskedules en skale

Navorsingsmetodes

Slegs die mees algemene metodes word behandel, soos opnames en eksperimente

Komponente van ‘n navorsingsvoorstel

Komponente van ‘n navorsingsverslag

ROOSTER EN KONTAKGELEENTHEDE

Die module het ses praktikums en twee tutoriale per week. Studente mag nie sonder goeie redes afwesig wees van kontaksessies nie. Mediese sertifikate moet voorgelê word of indien onvoorsiene omstandighede opduik, moet die studente die dosent voor die bepaalde kontaksessie in kennis stel van afwesigheid. Omdat die kontaksessies praktikums en tutoriale is, word daar werk binne klasverband afgehandel. Studente mag dus nie wegbly nie. Die kontaksessie vir Projek II en Projek I word afwisselend aangebied sodat studente moet reken op ‘n bloktyd van ongeveer sewe weke vir elkeen van die projekte.

LEERGELEENTHEDE EN OPDRAGTE

Kontaksessies: Tydens die kontaksessies sal lesings aangebied word oor bepaal temas soos hierbo genoem. Die opdragte sal ook tydens kontaksessies breedvoerig bespreek word, terugrapportering word gedoen, byvoorbeeld die navorsingsvoorstel en die interimverslag word in klastyd (kontaksessies) gelewer.

Lesings: Riglyne vir die skryf van navorsingsvoorstelle en –verslae sowel as inligting oor navorsing soos hierbo uiteengesit, vind tydens lesings plaas.

Opdragte: Studente moet ‘n navorsingsvoorstel, interimverslag en finale verslag saamstel en daaroor rapporteer. Breedvoerige inligting oor wat verwag word, word tydens kontaksessies aan die studente verskaf en verduidelik.

Selfstandige werk: Studente moet self verantwoordelikheid neem om die navorsing te beplan, deur te voer en te rapporteer. Die dosent speel die rol van raadgewer en fasiliteerder.

STUDIEBRONNE

‘n Verskeidenheid naslaanbronne oor navorsing sal gebruik word en moet deur studente self aangevul word. Handboeke wat in vorige modules gebruik is, moet noodwendig weer gebruik word. Bykomend hiertoe kan die volgende boeke gebruik word:

1. BLESS, C & HIGSON-SMITH, C. 1995. Fundamentals of social research methods. An African perspective. 2^nd ed. South Africa, Kenwyn. Juta.

2. KRUEGER, RA & CASEY, MA. 2000. Focus groups. A practical guide for applied research. Thousand Oaks, California. Sage.

3. LEEDY, PD. 1997. Practical research. Planning and design. 6^th ed. Upper Saddle River, New Jersey. Prentice Hall.

4. MOUTON, J. 1996. Understanding social research. South Africa, Pretoria. JL van Schaik.

5. TOULIATOS, J & COMPTON, NH. 1992. Research methods in Human Ecology/Home Economics. Ames, Iowa. Iowa State University Press.

ASSESSERING

Deurlopende evaluering word gedoen met die punteverdeling soos volg:

1. ‘n Navorsingsvoorstel (20%):

evaluering van die geskrewe navorsingsvoorstel en die mondelinge voordrag daarvan

2. ‘n Interimverslag (10%):

evaluering van die mondelinge voordrag van ‘n tussentydse verslag

3. ‘n Finale verslag:

evaluering van die geskrewe verslag (30%)

evaluering van die mondelinge rapport of plakkaatsessie (20%)

3. ‘n Toets (20%):

dit word in eksamentyd geskryf en handel oor sekere teoretiese aspekte van navorsing soos hierbo uiteengesit

TEIKENDATUMS

Volgens die Universiteit van Stellenbosch se Eksamen- en Toetsrooster vir 2005 skryf die studente op die volgende datum toets:

Novembereksamen: 8 November 2005 om 9:00

Datums vir inhandiging van die onderskeie take word in oorleg met die studente bepaal. Voorlopig word die volgende in vooruitsig gestel:

Navorsingsvoorstel: 2 September 2005

Interimverslag: 3 Oktober 2005

Finale verslag: 9 November 2005

Aanbieding: 9-11 November 2005

EM Visser

2005