Honneursprogram

Doelstellings
Hierdie program het ten doel om aan studente gevorderde kennis oor ‘n breë spektrum van erkende subterreine in die Sielkunde, soos Psigoterapie, Psigopatologie, Psigometrie en Navorsingsmetodologie te bied, en om aan hulle ‘n begrip te gee van die toepaslikheid daarvan in 'n multikulturele samelewing. Die uitgebreide en diepgaande aard van die programinhoud het ook ten doel om begrip van en insig in menslike gedrag te bevorder.

Toelatingsvereistes
‘n Student kan, op skriftelike aansoek, deur die Senaat of deur die Uitvoerende Komitee handelende namens die Senaat, tot die Honneursprogram in Sielkunde toegelaat word mits sy/hy in besit is van ‘n Bacalauriusgraad met Sielkunde as hoofvak, wat met ‘n prestasiepunt van minstens 60% verwerf is. ‘n Hoër prestasiepunt in Sielkunde III kan as afsnypunt vir toelating tot die program bepaal word na gelang van die getal en prestasiepeil van die aansoekers.
Toelating tot die program is aan keuring onderworpe, wat in November van die voorafgaande jaar plaasvind.
Die sluitingsdatum vir aansoeke om toelating tot die program is 31 Oktober van die voorafgaande jaar.

Struktuur
Die program kan óf op 'n eenjarige voltydse óf op 'n deeltydse basis oor twee jaar gevolg word. Die program word ook na-uurs aangebied om studente wat 'n werk beklee, te akkommodeer. Die program omvat 1 jaarmodule, 4 semestermodules, en 8 kwartaalmodules. Die Navorsingsmetodologie, Psigoterapie, Psigopatologie en Psigometrie, is verpligtend vir studente wat in aanmerking wil kom vir toelating tot professionele opleiding in Sielkunde.

Modules wat aangebied word, kan van jaar tot jaar verskil. Ten einde die graad te verwerf, moet ’n student 'n minimum van 130 krediete verwerf.

Modules (krediete)

Navorsingsmetodologie bestaan uit twee afdelings, naamlik Kwantitatiewe Metodes en Kwalitatiewe Metodes. In die afdeling Kwantitatiewe Metodes word aandag geskenk aan eksperimentele navorsing in die Sielkunde, met sterk klem op die ontwikkeling van 'n wetenskaplike, sistematiese en kritiese manier van dink oor navorsing. Die afdeling Kwalitatiewe Metodes is in 'n beplanningsfase.

Data-analise behels die bestudering en praktiese toepassing van statistiese metodes wat in die Sielkunde gebruik word om data te analiseer. Die klem val op hoe bepaalde metodes geselekteer word, die interpretasie van resultate en die wetenskaplike rapportering daarvan. Die statistiese pakket SPSS (Statistical Package for the Social Sciences) word veral in die meer gevorderde metodes van analise in die praktiese deel van die afdeling benut. Studente het toegang tot ses rekenaars wat met die nuutste weergawe van SPSS for Windows gelaai is.

Hierdie module het ten doel om aan die student 'n diepgaande kennis van die breë psigoterapie-terrein te gee. Terapeutiese benaderings wat bestudeer word, sluit onder andere die volgende in: psigodinamiese terapie, eksistensiële terapie, persoonsgesentreerde terapie, kognitiewe-gedragsterapie, Gestaltterapie en Transaksionele Analise.

Aan die einde van die module behoort die student ten opsigte van elkeen van die terapeutiese benaderings 'n omvattende teoretiese kennis te hê sodat hy/sy krities oor die verskillende terapieë in die besonder en oor psigoterapie in die algemeen kan dink, vertroud te wees met die praktiese prosedures eie aan elke benadering, 'n geval psigodinamies vanuit die verskillende benaderings te kan formuleer, insig in die verloop van die terapeutiese proses te hê, begrip hê van die beoefening van psigoterapie binne 'n multi-kulturele konteks, en op grond van uitkomsstudies die effektiwiteit van bepaalde terapeutiese benaderings te kan beoordeel.

1.       Kliniese evaluasie en die DSM-IV
2.       Delirium, Demensie en Amnestiese en ander kognitiewe versteurings
3.       Substansverwante versteurings
4.       Skisofrenie en ander psigotiese versteurings
5.       Persoonlikheidsversteurings
6.       Gemoedsversteurings
7.       Selfmoord en Gesinsmoord
8.       Angsversteurings
9.       Slagoffers van Geweld
10.     Somatoforme Versteurings
11.      Dissosiatiewe Versteurings
12.     Seksuele Versteurings en Versteurings van Geslagsidentiteit
13.     Eetversteurings
14.     Slaapversteurings
15.     Faktiewe en Impulskontrole Versteurings
16.     Aanpassingsversteurings en V-kodes
17.     Kultuurgebonde Sindrome en Kulturele Formulerings

Hierdie module het ten doel om studente bekend te stel aan basiese psigometriese konsepte en sielkundige toetskonstruksie. ‘n Verdere doelstelling is om studente vertroud te maak met enkele algemeen gebruikte sielkundige toetse. Aan die einde van die module behoort studente ‘n sielkundige meetinstrument te kan konstrueer. Studente behoort verder daartoe in staat te wees om ‘n geskikte sielkundige toets vir ‘n bepaalde situasie te selekteer. In hierdie verband is dit belangrik dat die multikulturele samestelling van die Suid-Afrikaanse samelewing in ag geneem word. In die laaste plek behoort studente vertroud te wees met die gebruikswaarde van bekende Suid-Afrikaanse vermoëns-, persoonlikheid-, en belangstellingstoetse.

Hierdie module het te make met die toepassing van sosiaal-sielkundige teorieë, beginsels, metodes en navorsingsbevindings ten einde sosiale probleme te verstaan en by te dra tot die oplossing daarvan. Die module fokus spesifiek op die Suid-Afrikaanse konteks en spreek vraagstukke aan soos sosiale identiteit, vooroordeel, diskriminasie, aggressie en geweld.

Benewens die verwerwing van teoretiese begrip van die betrokke vraagstukke sal die studente ook praktiese ervaring opdoen in die konseptualisering, beplanning, uitvoering en rapportering van ‘n sosiaal-sielkundige navorsingsprojek wat met die teoretiese fokusareas verband hou. Die praktiese komponent van die module dra dus daartoe by dat die studente benewens ‘n in-diepte begrip van spesifieke vraagstukke ook die geleentheid het tot die ontwikkeling van vaardighede om die teorie in die konteks van die huidige realiteit toe te pas.

Na afloop van die module in Beroepsielkunde behoort studente in staat te wees om basiese beroepsvoorligting te kan doen asook sekere funksies binne menslike hulpbronverband te kan verrig. Baie klem word gelê op die ontwikkeling en produktiewe aanwending van menslike potensiaal. Verder word studente ’n breë agtergrond gegee ten opsigte van die belangrikste teorieë oor die beroepsielkunde en die toepassing daarvan binne die spesifieke problematiek van die Suid-Afrikaanse werkswêreld. Van studente sal ook verwag word om op hierdie terrein praktiese werk te doen in die vorm van gemeenskapsdiens.

Die vaardigheid om behoeftebepalings vir gemeenskaps/ groepsintervensies te doen en op grond daarvan ’n intervensie te ontwerp en te implementeer word toenemend belangrik vir persone wat sielkundige werk in Suid-Afrika wil doen. In hierdie module kry studente die geleentheid om te leer hoe sielkundige intervensies prakties in gemeenskapsverband gedoen word. Die module is so ontwerp dat studente die verskillende fases van ‘n gemeenskapsintervensie teoreties en prakties bemeester. Dit beteken dat elke student aan die einde van die module in staat sal wees om ‘n sielkundige gemeenskaps-intervensie te beplan en te implementeer. Die afhandeling van elke fase word bepunt en studente verkry uiteindelik ‘n punt vir hierdie module wat op deurlopende evaluering berus. In die module word op gemeenskapsverskynsels soos adolessente-seksualiteit of substansmisbruik deur studente gefokus. Die module behels dat elke student:

(i) die ekologiese perspektief as teoretiese vertrekpunt vir gemeenskapsintervensies beredeneer en toepas;

(iii) doelwitte formuleer om die behoeftes/teikengedrag wat geïdentifiseer is, aan te spreek;

(v) ‘n intervensie ontwerp wat op hierdie sielkundige verklaring/teorie berus.

Om verskillende gesinsvorme en die kompleksiteit van gesinsfunksionering te verstaan, word die volgende temas gedek:

· Teoretiese modelle vir gesinsbevoegdheid, funksionering en genetiese invloede

· Veranderinge en uitdagings in dubbelloopbaan- en geskeide gesinne
Hertroue, aanneming en stiefouerskap

· Die module verskaf die nodige voorbereiding en onderbou vir sielkundige werk met verskillende gesinsvorme. Waar moontlik word Suid-Afrikaanse navorsing betrek en bespreek.

Die module bestaan uit 'n algemene oriëntasie ten opsigte van die studieveld, ‘n gevorderde studie van die ontwikkelingsfases van normale kinders en adolessente asook die ontwikkelingstake en stressors kenmerkend van elke stadium. Die sielkundige evaluasie, klassifikasie en sielkundige behandeling van die meer bekende probleme van kinders en adolessente, word bespreek. Besondere aandag word gegee aan die bestudering van die moontlike oorsake van kinderprobleme. In die module word die fokus geplaas op kinders in die Suid-Afrikaanse konteks. Studente kry ook blootstelling aan praktiese observasie-geleenthede.

Die module het ten doel om studente in staat te stel om 'n deeglike kennis te verkry van belangrike teoretiese modelle wat die werking van die menslike geheue beskryf, en bied hulle die geleentheid om betrokke te raak by navorsingsprojekte wat die toepassing van hierdie kennis in die praktyk ondersoek.

Van studente sal verwag word om betrokke te raak by een van verskillende projekte wat deur die persone betrokke by die module aangepak sal word. Studente sal aangemoedig word om na die suksesvolle voltooiing van die honneurs studiejaar, hierdie projekte uit te brei na verdere nagraadse studie.

Die doel van die module is om ‘n teoretiese en persoonlike begrip van menslike seksualiteit aan studente te verskaf. Meer spesifieke doelwitte is:

· Begrip van die beperkings van huidige pogings om menslike seksuele gedrag te verander; en

Die inhoud van die module sluit die volgende in: Teoretiese perspektiewe op seksualiteit; Lewenssiklus en seksualieit; Fisiologie van seksualiteit; Sielkunde van seksualiteit; Geslag en seksualiteit; Attraksie, intimiteit en liefde; Diversiteit van seksualiteit en seksuele gedrag; Seksopvoeding; en Seksueel Oordraagbare Siektes.

Die doel van die module is om studente toe te rus met 'n teoretiese begrip van spesifieke kwessies met betrekking tot die geslagtelike ontwikkeling (“gendered development”) van vroue. Na voltooiing van die module sal die student bewus wees en kennis hê van die volgende kwessies:

· lewensiklus van vroue: babajare, vroeë kinderjare, adolessensie, jong
volwassenheid, moederskap, menopouse/ lewensoorgang;

Modules word óf deurlopend óf tydens skriftelke eksamens geëksamineer. Skriftelike eksamens word in Junie en November afgelê. Die aantal vraestelle hang onder andere af van ‘n student se keuse uit die moontlike modules.

Hierdie module bestudeer die verhouding en die interafhanklikheid van alle lewende wesens met spesifieke fokus op die mens-in-die-natuur. Teen die agtergrond van die wêreld se sosiale en ekologiese krisis, sal die student kennis opdoen en bewusgemaak word van die volgende temas:

Beginsels en toepassing van ekosielkunde
Filosofie onderliggend aan ekosielkunde
Skakeling tussen sielkunde en ekologie (persoon en omgewing)
Ekologiese identiteit, ontwikkeling en die ekologiese self
Gesondwees en genesing
Toepassing van ekologiese insigte in die sielkundepraktyk
Groepsprosesse en toegepaste aktiwiteite in die natuur
Wildernisterapie

Die module sal ook ‘n praktiese geleentheid insluit om teorie en praktiese toepassing te integreer en blootstelling te kry in wildernisterapie.

Slegs aansoekers wat Sielkunde 3 of 'n ekwivalente module met 'n gemiddelde prestasiepunt van minstens 60% geslaag het, sal vir toelating tot die program oorweeg word. Aansoekers het drie opsies: (1) doen aansoek vir toelating tot die oggendgroep; (2) doen aansoek vir toelating tot die aandgroep; (3) doen aansoek vir die oggend- óf die aandgroep. In laasgenoemde geval word studente deur die Departement aan een van die twee groepe toegewys en geen verskuiwing tussen die groepe sal daarna toegelaat word nie. 'n Maksimum van 45 aansoekers sal tot die oggendgroep en 'n maksimum van 45 tot die aandgroep toegelaat word. Keuring geskied op grond van akademiese oorwegings en 'n prestasie-afsnypunt word jaarliks bepaal na gelang van die aantal aansoekers en hul prestasiepeil. Die keuringsbeleid is op aanvraag by die Registrateur beskikbaar. 'n Gesertifiseerde kopië van u puntestaat moet u aansoek vergesel. Aansoekers wat nog met Sielkunde III besig is, moet 'n gesertifiseerde puntestaat met hul halfjaarpunte en alle punte wat beskikbaar is vir die tweede semester, by hul aansoekvorms insluit.

Dit is noodsaaklik dat alle aansoekers die Aansoekvorm van die Departement Sielkunde sowel as die Aansoekvorm van die Universiteit moet voltooi (beide op die webblad beskikbaar). Hiersonder kan aansoeke nie oorweeg word nie. Pos u aansoek aan: Me GD Davids, Kamer 3006, Kursusafdeling, Universiteit van Stellenbosch, Privaatsak X1, 7602 MATIELAND.

Die sluitingsdatum vir aansoeke is 31 Oktober van die jaar wat u studie voorafgaan. Voornemende studente sal gedurende Desember in kennis gestel word of hulle aansoeke suksesvol was. Die program begin op die eerste dag van die akademiese jaar.

Die beslissing van die keuringskomitee is finaal en geen korrespondensie sal gevoer word nadat keuring plaasgevind het nie.