Baie dankie vir u belangstelling in ons nagraadse opleiding in Kliniese Sielkunde. Ons waardeer dit dat jy die Universiteit van Stellenbosch vir hierdie opleiding oorweeg.

Hierdie blad het ten doel om inligting oor die opleidingsprogram en die voorafgaande seleksieproses te verskaf.

Soos u weet, word 'n nuwe bedeling vir die opleiding van sielkundiges in die vooruitsig gestel. Die bestaande vereistes van die Beroepsraad vir Sielkunde behels 'n Magistergraad en eenjarige internskap. Volgens die jongste besluit van die Beroepsraad sal studente vanaf 1 Januarie 2004 by universiteite vir 'n doktorsgraad moet registreer om as sielkundige opgelei te word. Studente wat in 2003 met opleiding begin, doen dus steeds 'n Magistergraad en het die opsie om daarna met 'n doktorsgraad voort te gaan, indien hulle so verkies. Ons opleiding in die magisterprogram in Kliniese Sielkunde is soos volg gestruktureer:

Die tweede jaar behels 'n eenjarige internskap van 12 maande by 'n geakkrediteerde instansie.

Toelating tot die professionele opleidingsprogram in Kliniese Sielkunde is van keuring afhanklik wat jaarliks in Augustus plaasvind. In die verband is die volgende inligting belangrik:

• Die sluitingsdatum vir aansoeke vir 2003 is 30 Junie 2002. Voltooi asseblief die meegaande aansoekvorm en stuur dit terug aan die Programkoördineerder (adres op aansoekvorm).

• Sluit 'n volledige studierekord (voorgraads en honneurs, indien laasgenoemde graad reeds verwerf is) by u aansoek in. Indien u die honneursprogram vanjaar volg, moet 'n voorgraadse studierekord en 'n verslag oor u honneurspunte tot Junie 2002 aangeheg word.

• Twee referentvorms moet deur referente van u keuse voltooi word en deur hulle aan die Programkoördineerder gestuur word. Maak asseblief seker dat u referente gebruik wat u goed ken, verkieslik 'n dosent en iemand wat oor u relevante werk- en/of lewensondervinding kan getuig. Versoek asseblief u referente om die aansoekvorm noukeurig en volledig te voltooi.

• Let asseblief daarop dat u aansoek per pos versend moet word of per hand afgelewer moet word. Aansoeke wat gefaks of per e-pos gestuur word, sal nie oorweeg word nie.

• Na ontvangs van die aansoeke vind 'n pre-seleksie plaas. Die uitslag hiervan sal op Woensdag 1 Augustus 2002 bekend wees.

• Keuring vind tussen 20 en 22 Augustus op Stellenbosch plaas.

U word vriendelik versoek om die Departement Sielkunde op 1 Augustus, of so spoedig moontlik daarna, te skakel (tel. 021-8083461). U sal dan ingelig word of u tot die keuringsproses toegelaat is en op watter dae gedurende die week van 20 tot 22 Augustus u op Stellenbosch vir keuring moet aanmeld.