1. Navrae
2. Algemene Doelstellings
3. Toelatingsvereistes
4. Programinhoud en -struktuur

Navrae

Programkoördineerder : Prof Marianna Visser
Telefoonnommer : (021) 808-2106
E-pos : mwv@sun.ac.za

Algemene Doelstellings

Die algemene doelstellings van die BA in Geesteswetenskappe is om studente toe te rus met daardie geesteswetenskaplike kennisinhoude en intellektuele vermoëns en vaardighede wat hulle nodig sal hê om in ’n professionele hoedanigheid ’n verskeidenheid probleme van die Suider-Afrikaanse werklikheid van die een-en-twintigste eeu te kan oplos of hanteer.

Toelatingsvereistes

• Volle matrikulasievrystelling
• Persentasie in skooleindeksamen: 50% gemiddeld
• Indien Musiek as vak gevolg word: Graad IV (UNISA) in teorie of ekwivalent soos deur die Departement Musiek bepaal en/of die aflegging van 'n toelatingseksamen

Programinhoud en -struktuur

Besonderhede

Die inhoud van die BA in Geesteswetenskappe word op drie agtereenvolgende jaarvlakke aangebied:

• ’n Eerstejaarsvlak wat as die basisvlak beskou word. Op hierdie vlak word inhoude gedoseer wat inleidend is en ’n grondslag lê vir inhoude wat op die verdere vlakke aangebied word.

• ’n Tweedejaarsvlak wat as die intermediêre vlak beskou word. Op hierdie vlak word daar nog inhoude gedoseer wat nie noodwendig oor geesteswetenskaplike aspekte van die spesifieke Suider-Afrikaanse werklikheid handel nie, maar wat direk relevant is vir die verstaan van problematiese aspekte van hierdie werklikheid. In tutoriale en praktika word die relevansie van hierdie inhoude vir begrip van problematiese geesteswetenskaplike aspekte van die Suider-Afrikaanse werklikheid sistematies geïllustreer.

• ’n Derdejaarsvlak wat as die gevorderde vlak beskou word. Die inhoude op hierdie vlak, in formele voorlesings sowel as tutoriale en praktika, is op problematiese geesteswetenskaplike aspekte van die Suider-Afrikaanse werklikheid gefokus. Die student doen in elk van die twee hoofvakke ’n hoeveelheid werk wat daarop gerig is om die integrasie van die inhoude binne en tussen dié twee vakke te verhoog en om die koherensie van die BA-program in Geesteswetenskappe in sy geheel te bevorder. Hierdie werk, waarna as die sluitsteenkomponent verwys word, kan verskeie vorms aanneem: (interdepartementele) seminare, skriftelike werkstukke, verskillende vorms van praktiese werk, ens. Die gewig van die sluitsteenkomponent is 5 krediete per hoofvak.

Programsamestelling

Opmerking:

Besonderhede van die inhoude van standaardmodules en vakke, asook bepalings omtrent die volg van vakke word weergegee in die departementele modulelys soos uiteengesit in Afdeling 6 van die Jaarboek (raadpleeg inhoudsopgawe vir bladsynommer). Raadpleeg ook Uiteensetting van modules aan die einde van die programinskrywing, soos uiteengesit in die Jaarboek (deel 4), ten einde te bepaal watter modules gevolg moet word.

Op eerstejaarsvlak word 5 vakke (24 krediete elk) plus Inligtingsvaardighede 172 (6 krediete) gevolg.

Die vakkeuse word soos volg saamgestel: In twee van die bane genommer 1 tot 3 moet twee vakke per baan gevolg word. In die oorblywende baan word slegs een vak gevolg. Die baan waarin slegs een vak gevolg word, loop dood aan die einde van die eerste jaar. (Daar kan dus nie met die betrokke vak op tweedejaarsvlak voortgegaan word nie).

Op tweedejaarsvlak word 4 vakke (32 krediete elk) gevolg.

Tweedejaarstudie behels voortgesette studie van die twee bane waaruit elk twee vakke gekies is. Aan die einde van die tweede jaar loop een van hierdie twee bane dood. (Die student sal dus met twee vakke wat in een van die twee bane gevolg is voortgaan.)

Op derdejaarsvlak word 2 vakke (48 krediete elk) plus 2 metamodules in baan 4 (12 krediete elk) gevolg. Derdejaarstudie behels voortgesette studie van twee vakke wat in een van die bane op tweedejaarsvlak gevolg is.

besoekers sedert 15 April 2002