Akademiese Programme: MA Gestruktureerd (2 Jaar)

MA-PROGRAM IN GESKIEDENIS (Twee jaar – gestruktureerd) 887

Die kursusse is probleemgerig en die onderwerp van die tesis word streng afgebaken.

Toelatingsvereistes

Om tot hierdie program toegelaat te word, moet kandidate:

or ’n BA-graad in Geskiedenis of Kultuurgeskiedenis beskik, met ’n minimum slaagsyfer van 60%;
voor 30 November ’n skriftelike aansoek met ’n uitvoerige studierekord indien, en indien nodig vir ’n persoonlike onderhoud beskikbaar wees. ’n Formele aansoek om registrasie is slegs nodig sodra ’n student vir ’n program aanvaar is;
’n formele kontrak met die Departement aangaan wat die pligte en verantwoordelikhede van albei partye uiteensit.
Studente wat nie aan die vereiste standaard van 60% voldoen nie, kan spesiale oorwegings vir toelating indien.

Programstruktuur en -inhoud

Hierdie tweejarige opsie bestaan uit ’n gestruktureerde komponent en ’n tesiskomponent. Die omvang van die onderwerp van die tesis is beperk. Hierdie opsie volg op ’n BA-graad met Geskiedenis as hoofvak.

Die gestruktureerde komponent

Daar word van jou verwag om AGT modules in die gestruktureerde komponent te voltooi. Dit behels vier verpligte modules wat teoreties van aard is (sien spyskaart) en inhoudsmodules van die departement se spyskaart van spesialisasievelde (sien spyskaart).

Teoretiese modules (verpligtend)

Teoretiese en filosofiese kwessies
Metodologie
Tendense in internasionale historiografie
Tendense in Suid-Afrikaanse historiografie

Vir kultuurgeskiedenis raadpleeg inhoudsmodules op spyskaart

Inhoudsmodules

’n Keuse van VIER modules van die departementele spyskaart
Indien een van u spyskaart keuses die kultuurgeskiedenisopsie is moet u spesifieke keuse binne hierdie opsie met die betrokke dosent en die Departementele Voorsitter uitgeklaar word.

Historiese faktore in die skep van minderheidskulture: die skep van wit en bruin identiteite in 20ste-eeuse Suid-Afrika
Afrikaner-diaspora: die veranderende rasionaal vir migrasie, 1875-2002
Omgewingsgeskiedenis: samelewing, natuur en die veranderende omgewing [Kliek hier vir die volledige kursusraamwerk vir hierdie module. Hierdie dokument maak in ’n nuwe venster oop.]
Besigheidsgeskiedenis
Werkersklasgeskiedenis en arbeidsorganisasie
Oorlog en die samelewing: konteks en gevolge
Geskiedenisse van die liggaam [Kliek hier vir die volledige kursusraamwerk vir hierdie module. Hierdie dokument maak in ’n nuwe venster oop.]
Kultuurgeskiedenis. ’n Keuse van onder meer die volgende modules: argitektuur, meubelkunde, volkswoordkunde, volkswetenskap en -geloof, genealogie/heraldiek, erfenisbewaring, Westerse kultuurstrominge, Navorsingsmetodologie en Kultuurgeskiedenis as wetenskap

Metodes en vereistes ten opsigte van die modules

Alle modules wat vir die gestruktureerde komponent van ’n MA-opsie vereis word, moet verkieslik, sover prakties moontlik, tydens die eerste jaar van die kursus voltooi word. Deeltydse studente het die keuse om een van die inhoudsmodules na die tweede jaar oor te dra.
Elke module word oor ’n tydperk van sewe weke (een kwartaal) aangebied en sluit studiemateriaal, opdragte en ’n eksamen in. Die dosent bepaal die lengte van die opdragte. (Kultuurgeskiedenis word in blokkursusse van een week elk aangebied.)
Die dosent bepaal die kontaksessies. Die dosent bepaal ook die spesifieke datums waarop opdragte ingelewer moet word. Dit staan studente vry om, afgesien van die formele kontaksessies, afsprake met dosente te reël om aspekte van die werk te bespreek.
Afgesien van die opdragte wat vir die modules voltooi moet word, moet studente ook een navorsingswerkstuk voltooi. Die navorsingswerkstuk moet fokus op ’n aspek van een van die vier inhoudsmodules (een van die opdragte kan tot ’n werkstuk uitgebrei word) wat die student gekies het van die spyskaart van spesialisvelde wat deur die departement aangebied word. Die algemene riglyn is dat die navorsingswerkstuk nie langer as 5 000 woorde moet wees nie en dat dit op ongeveer 12 tot 15 standaardbronne gebaseer word. Algemene geskiedeniswerke, ensiklopedieë, naslaanwerke, chronologiese woordeboeke, ens. word nie as standaardbronne beskou nie.
Benewens die navorsingswerkstuk moet die student ’n navorsingsvoorstel vir die onderwerp van sy/haar tesis ontwikkel. Dit moet 2 500 tot 3 000 woorde lank wees en uit die volgende komponente bestaan:
- Probleemstelling en fokus
- Voorafstudie en rasionaal
- Doelwitte, teoretiese raamwerk en hipotese(s) of navorsingsvrae
- Navorsingsontwerp en metodes
- Tydraamwerk en voorlopige hoofstukuiteensetting
- Impak
- Aansluiting by departementele programme
- Bibliografie
Die tegniese versorging en uitleg moet ooreenkom met departementele voorskrifte soos tydens die voorgraadse kursusse aan studente voorgehou is. Die navorsingswerkstuk en die navorsingsvoorstel moet in getikte formaat ingedien word.
* ’n Klaspunt vir elke module word op grond van die studente se opdragte toegeken. Afgesien van die klaspunt ontvang die studente ook ’n eksamenpunt deur ’n eksamen per semester af te lê oor die modules wat tydens daardie semester voltooi is. Die finale punt per module word bereken op die basis van 50% van die klaspunt en 50% van die eksamenpunt. Die gemiddelde van die finale punte van die agt modules vorm die finale prestasiepunt vir die gestruktureerde komponent van die kursus. Dit verteenwoordig 50% van die graadpunt. Die navorsingskomponent verteenwoordig die oorblywende 50%.

Die tesis

Studente moet in gedagte hou dat die wyse keuse van ’n navorsingswerkstuk tydens die gestruktureerde deel van die program reeds een tree in die regte rigting is. Die onderwerp van die tesis kan enige tyd tydens die loop van die studie gekies word. Die student moet ’n formele navorsingsvoorstel voorlê.

Die onderwerp van die tesis moet verkieslik relevant wees tot die spyskaartopsies van die gestruktureerde komponent van die program. Dit staan studente vry om met enige van die dosente wat vir die gestruktureerde komponent van die program verantwoordelik is oor ’n tesisonderwerp te onderhandel. Indien hulle probleme ondervind om ’n besluit hieroor te maak, kan hulle die departementele voorsitter raadpleeg. Die lengte van die tesis moet beperk word tot tussen 100 en 150 bladsye. Die tesis word in alle opsigte volgens die voorskrifte in die Jaarboek bestuur.